قوم يا سيدي قوم.. يابنت الحلال خليني أنام شويه،، أقولك قوم شكلو الشغاله شردت.. إيش تقولي انتي لا تجنينييني؟ اقولك صحصح من نومك واسمعني إيش رايح أقولك الشغاله شردت أفهم رحت أدور عليها في غرفتها ما لقيتها ودورت عليها في البيت كله وما لقيتها شكلها شردت اخر الليل.. طب روحي فتشي البيت لا تكون سرقت شيء من هنا والا من هنا.. لا ياسيدي البيت سليم ما سرقت ولا شيء.. طيب الحمدلله فين شردت دي الله يهد حيلها ونحنا طيبين معاها وبنعاملها أحسن معامله تقوم تشرد ونحنا ما صدقنا إنه صححنا وضعها لا حول ولا قوة إلا بالله.. إيش حتسوي دحين ياسيدي؟ إيش حسوي يعني لكن ما أقول إلا أمري وخيرتي لله بعد ما هجولتنا أكتر من شهر وخلتنا نمسك سرى في أنصاص الليالي في الزحام داك اللي ما شفت زيو طول عمري ومشورتنا مشاوير القضا مابين الجوازات والقنصليه حقتها عشان جوازها اللي دخلت فيه البلد اليين رجولي ورمت وبققت من كتر المشي والروحه والجية هدا غير انها بهدلتنا ودوختنا وطفرتنا آلاف الريالات اللي دخلت في جيوب حبايبنا المعقبين اللي ما عندهم إلا سلخ في عباد الله عشان نصحح وضعها تقوم في النهاية تشرد هدا نهاية المعروف يعني الواحد كان خايف على نفسه من حكاية الغرامه والسين والجيم من الجهات المختصه لو كانت هادي الشغاله بتشتغل عندي من غير ما أصحح وضعها تقوم تشرد.. طب إيش الحل دحين ياسيدي؟ إيش الحل يعني،، الحل معروف وأبسط مما تتصوري حروح لحبايبنا اللي في الجوازات وأقولهم إنه شغالتي شردت وحيجيني الرد (هوا) سويلها بلاغ هروب وحسوي بلاغ هروب وكان الله بالسر عليم وكنك يبو زيد ما غزيت وعادت حليمه لعادتها القديمه عشان كده بقول لحبايبنا في الجهات المختصه لازم يكون في حزم وشده وإجراءات مشدده في الحكاية دي وياريت يستدلوا على الخادمات الشاردات والسائقين الشاردين من أرقام جوالاتهم ويراقبوا مكالماتهم ويعرفوا هما يكلموا مين وفين أماكنهم ومتخبيين فين وهما ما شاء الله عليهم خبراء وفاهمين وشاطرين في الحكاية دي وفوق كده كمان يعرفوا من اتصالاتهم مين هما السماسره اللي جالسين يكلموهم ويبيعوا ويشتروا فيهم واللي بيحرضوهم كمان على الشرده عشان كده بقول ارحمونا واحمونا من الحكاية هادي اللي تعبتنا وبهدلتنا وطفرتنا ولا يكون الحل الوحيد هوه روح سوي (بلاغ هروب) ونرجع لموال تيتي تيتي زي ما رحتي زي ما جيتي وعيشوا كتيييييير تشوفوا كتيييييير.